Sual/Cavab
HÖRMƏTLİ İSTİFADƏÇİLƏR!

Azərbaycan Respublikası Prezidenti cənab İlham Əliyevin internet səhifəsi Konstitusiyanın 57-ci maddəsinə uyğun olaraq vətəndaşların müraciət etmək hüququnun reallaşdırılması vasitəsidir.Hər bir istifadəçinin məktub göndərmək, arzularını bildirmək, onu maraqlandıran məsələlər barədə yazmaq, təklif, ərizə və şikayətlə müraciət etmək imkanı vardır.

SƏFƏRBƏRLİK VƏ HƏRBİ XİDMƏTƏ ÇAĞIRIŞ ÜZRƏ DÖVLƏT XİDMƏTİNİN ÜNVANINA ELEKTRON FORMADA MÜRACİƏT GÖNDƏRMƏZDƏN ƏVVƏL, XAHİŞ EDİRİK QAYDALARLA TANIŞ OLUN:

1.Mətni yazmazdan əvvəl nəzərdə tutulmuş formanın düzgün cavablandırılması vacibdir.

2.Mətn mütləq yazıldığı dilin əlifbası ilə tərtib olunmalıdır, bütövlükdə böyük və ya kiçik hərflərlə yazılmamalı, cümlələrə bölünməli, durğu işarələrindən istifadə qaydalarına riayət edilməlidir.

3.Müraciət aydın və səlis cümlələrlə yazılmalıdır.

4.Müraciət edərkən etika qaydaları gözlənilməlidir. Nəzakətsiz ifadələr işlədildikdə və ya müəllif özü barədə məlumatları dəqiq göstərmədikdə müraciətə cavab verilmir.

5.Hörmətli internet səhifəsi istifadəçiləri! Böyük informasiya axınının işlənməsi xüsusiyyətlərini nəzərə alaraq, xahiş edirik bəzi məhdudiyyətlərə hörmətlə yanaşasınız:

Sualınızı yazın


Verilən suallar
Oruc Soruşur Yazılma Tarixi:09.04.2023 00:37:00

Salam mən dövlət sərhəd xidmətində müddetden artiq işləmişəm və ehtiyata buraxilmışam sexşi işim 9 mart tarixində Şəmkir vayinkamatına poçtla göndərilib ama vayinkamatdan deyirlər gəlməyib sənəd poçtla maraqlan ola bilərmiki bu məxfi sənədlər poçtla gönderilen itsin ?yeni 1 aya gelib cixmayib vayinkomata mən hara müraciət edim xaiş edirem cavablandırın

Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin internet portalına daxil olmuş müraciətinizə baxılmışdır.        Bildiririk ki, sizin şəxsi işiniz Azərbaycan Respublikası Dövlət Sərhəd Xidmətinin Sərhəd  Qoşunları “Qubadlı” Əlahiddə Sərhəd Diviziyasından xüsusi poçt vasitəsi ilə  28 mart  2023-cü il tarixdə Səfərbərlik və Hərbi Xidmətə Çağırış üzrə Dövlət Xidmətinin Şəmkir  rayon şöbəsinə daxil olmuşdur. Xidmətin Şəmkir  rayon şöbəsinə müraciət  etməyiniz məqsədə uyğun hesab edirik.  
Tamerlan Soruşur Yazılma Tarixi:08.04.2023 22:00:52

Salam,mən Türkiyədə təhsil alıram 18yaşım var,təshili dayandırıb əsgəliyə hərbi orkestra qoşulmaq istəyirəm,bunun üçün nə etməliyəm?

Bildiririk ki, Siz xarici universitetdə təhsil almağınızla əlaqədar Qaradağ rayon  çağırış komissiyasının qərarı ilə “Hərbi vəzifə və hərbi xidmət haqqında” Azərbaycan Respublikası Qanununun 21.1.5-ci maddəsi ilə 31.08.2026-cı il tarixədək müddətli həqiqi hərbi xidmətə çağırışdan möhlət hüququna maliksiniz. Əlavə olaraq bildiririk ki, Siz təhsil aldığınız universitetdən xaric olunmağınız və ya müddətli həqiqi hərbi xidmət keçmək üçün akademik məzuniyyət götürməyiniz barədə təhsil müəssisəsindən verilmiş rəsmi sənədi - arayışı Xidmətin qeydiyyatda olduğunuz Qaradağ rayon idarəsinə təqdim etdiyiniz halda, təhsilinizi davam etdirmək üçün verilmiş möhlət hüququ ləğv edilərək, rayon çağırış komissiyası tərəfindən çağırışa cəlb oluna bilərsiniz. Mürəciətinizdə qeyd etdiyiniz məsələ ilə əlaqədar isə gələcəkdə müddətli həqiqi hərbi xidmət keçəcəyiniz hərbi hissənin komandanlığına müraciət edə bilərsiniz.
Rəşad Soruşur Yazılma Tarixi:08.04.2023 14:41:05

Salam. Xarici ölkədə yaşayan bir ailə (bütün ailə üzvləri Azərbaycan vətəndaşıdır) yay tətilinə bir aylıq Azərbaycana qayıtmaq istəyirlər. Ailədə, yanvar 2006 doğumlu bir oğlan övladı var. Tətildən təkrar geriyə (yaşadıqları xarici ölkəyə) qayıdarkən 17 yaşı tamam olmuş (18 yaşına qədəm basan) övladına, hərbi çağırış ərəfəsində olduğu üçün çıxış qadağası qoyula bilərmi? Onu da deyim ki, uşaq hələ xaricdə orta məktəbdə oxuyur və buna dair əlində rəsmi sənəd var. Çıxışa icazə verilmədiyi halda nə etməli? Diqqətinizə görə təşəkkür edirəm.

Səfərbərlik və Hərbi Xidmətə Çağırış üzrə Dövlət Xidmətinin elektron ünvanına daxil olmuş müraciətinizə baxılmışdır. “Hərbi vəzifə və hərbi xidmət haqqında” Azərbaycan Respublikası Qanununun 6-cı maddəsinin tələblərini nəzərə alaraq bildiririk ki, 17 yaşı tamam olmuş Azərbaycan Respublikasının vətəndaşı, ilk növbədə, ilkin hərbi qeydiyyata alınması üçün təcili olaraq yaşayış və ya olduğu yer üzrə Xidmətin yerli struktur bölməsinə gəlməlidir.           Müraciətinizə cavab olaraq onu da qeyd edirik ki, Azərbaycan Respublikası Prezidentinin 2008-ci il 22 aprel tarixli 744 nömrəli Fərmanı ilə təsdiq edilmiş "Giriş-çıxış və qeydiyyat" idarələrarası avtomatlaşdırılmış məlumat-axtarış sistemi haqqında Əsasnamə"nin tələblərinə uyğun olaraq, Səfərbərlik və Hərbi Xidmətə Çağırış üzrə Dövlət Xidməti tərəfindən yalnız müddətli həqiqi hərbi xidmətə çağırılaraq, hərbi hissələrə təhvil verilən və müddətli həqiqi hərbi xidmətə çağırışdan yayınan çağırışçılar (çağırışçılar - 18 yaşı tamam olan vətəndaşlar) haqqında məlumatlar “Sərhədkeçməyə məhdudiyyət siyahısı”na daxil edilir.           Müddətli həqiqi hərbi xidmətə çağırışa cəlb olunma yaşında olmayan vətəndaşların isə dövlət sərhədindən sərbəst hərəkətinə tərəfimizdən hər hansı məhdudiyyət tətbiq olunmur.
Tural Soruşur Yazılma Tarixi:07.04.2023 11:47:35

Salam. Mənim qardaşım hərbi xidmətdə olub. Dünən qardaşımı Sumqayıt hərbi komisarlığına dəvət edib yenidən ona çağırış bildirişi təqdim etdilər və bunun təlimlə əlaqəli olduğunu qeyd etdilər. Mən bilmək istəyirəm ki, bu təlim neçə müddətlikdi və mənim qardaşımın çalışdığı müəssisəyə bununla bağlı hər hansı sənəd təqdim olunacaq və qardaşımın adında olan kreditləri necə olacaq?

      Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin rəsmi elektron ünvanına etdiyiniz müraciətə baxılmışdır.       Ehtiyatda olan birinci dərəcəli hərbi vəzifəlilərin döyüş vərdişlərini, hərbi ixtisaslarını və təcrübələrini təkmilləşdirmək məqsədi ilə 13 günlük hərbi təlim toplanışı nəzərdə tutulmuşdur. Azərbaycan Respublikasının “Hərbi vəzifə və Hərbi  xidmət haqqında” Qanununun 52.1-ci maddəsinə əsasən toplanışa çağırılmış hərbi vəzifəlilər çağırış üzrə vəzifələrini yerinə yetirdikləri, toplanış yerinə gedib-gəldikləri və toplanış keçirdikləri bütün dövrdə daimi iş yerində orta əmək haqqı saxlanılmaqla işdən azad edilirlər. Hərbi vəzifəlinin işlədiyi təşkilat ləğv olunduqda toplanış dövründə ona verilməli məbləğlər ləğv edilən təşkilat və ya onların hüquq varisi tərəfindən ödənilir. Bildiririk ki, hərbi vəzifəlilər toplanışlara göndərildikdən sonra toplanışlar üzrə çağırılmış hərbi vəzifəlilərin ailə üzvlərinə müvafiq imtiyazlardan istifadə edilməsi üçün arayış təqdim edilir.
Ruslan Soruşur Yazılma Tarixi:07.04.2023 10:38:18

Salam , oğlum 2022-ci il oktyabr ayında hərbi xidmətə getmişdir.Ukraynada ali təhsil alıb ancaq diplom aprelin axırında verıləcək.Mən diplomu alandan sonra nə edim ki,oğlum 1 il qulluq etsin.Əvvəlcədən təşəkkür edirəm.

Sizin Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin elektron ünvanına daxil olmuş müraciətinizə aidiyyəti üzrə baxılmışdır. Bildiririk ki, “Hərbi vəzifə və hərbi xidmət haqqında” Azərbaycan Respublikası Qanununun 38.1.1-ci maddəsinə əsasən, ali təhsilli çağırışçılar təqvim hesabı ilə 1 il, qalan çağırışçılar isə 1 il 6 ay müddətli həqiqi hərbi xidmət keçirlər. Ali təhsilli müddətli həqiqi hərbi xidmət hərbi qulluqçuları təhsil müəssisəsindən verilmiş diplomun notarial qaydada təsdiq edilmiş kserosurətini xidmət etdikləri hərbi hissəyə xidmət müddəti ərzində təqdim etdikdə onlar 1 ildən sonra ordu sıralarından tərxis olunurlar.
Ozan Soruşur Yazılma Tarixi:06.04.2023 21:52:17

salam men Ali təhsil müəssisələri tələbələrinin zabitlər hazırlanan xüsusi proqram üzrə hərbi hazırlığı proqramina qosulmaq isteyirem universitet telebesiyem hara muraciet ede bilerem?

Müraciətinizdə qeyd olunan məsələ ilə əlaqədar bildiririk ki, “Azərbaycan Respublikasının Silahlı Qüvvələri üçün ehtiyat zabit kadrlarının hazırlanması işinin təkmilləşdirilməsi haqqında” Azərbaycan Respublikasının Prezidentinin 2000-ci il 25 may tarixli 425 nömrəli Sərəncamının 2-ci hissəsində qeyd edilmişdir ki, Azərbaycan Respublikasının Müdafiə Nazirliyinə tapşırılsın ki, Azərbaycan Respublikasının Silahlı Qüvvələri tərkibinə müddətli hərbi xidmətə çağırılmış ali təhsilli gənclərin sırasından seçmə qaydasında zabit hazırlığı kursları təşkil edib bu kursların fəaliyyətini təmin etsin. “Hərbi xidmətkeçmə haqqında” Əsasnamənin təsdiq edilməsi barədə” Azərbaycan Respublikası Qanununun 58-ci maddəsinin “e” bəndinə əsasən, ehtiyatda olan zabit hazırlığı proqramı üzrə müəyyən edilən imtahanları vermiş ali təhsilli əsgər, matros və çavuşlara  müddətli həqiqi hərbi xidməti bitirdikdə “Leytenant” hərbi rütbəsi verilir. Sözügedən məsələ ilə əlaqədar Azərbaycan Respublikasının Müdafiə Nazirliyinə müraciət etməyiniz məqsədəuyğundur.
Rövşən Soruşur Yazılma Tarixi:05.04.2023 23:52:49

Təhsilimi davam etdirmək üçün, Hərbi çağırışdan necə möhlət ala bilərəm?

Sizin Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin elektron ünvanına daxil olmuş müraciətinizə aidiyyəti üzrə baxılmışdır. Bildiririk ki, “Hərbi vəzifə və hərbi xidmət haqqında” Azərbaycan Respublikası Qanununun 21-ci maddəsinin tələbləri ilə təhsil alan çağırışçılara müddətli həqiqi hərbi xidmətə çağırışdan möhlət verilir. Bununla əlaqədar, çağırışçılar təhsil almaları barədə sənədi Xidmətin qeydiyyatda olduqları struktur bölməsinə təqdim etdikləri halda müvafiq təhsilini bitirənədək çağırışdan möhlət verilir.
Taleh Soruşur Yazılma Tarixi:05.04.2023 21:36:23

29 martda Gedebey rayon SHXÇDX qeydiyyata düşmüşem 17 sinə çağırış əmri verilib amma hara düşdüyümü bilmirem

Müraciətinizlə əlaqədar bildiririk ki, Siz 2023-cü ilin aprel çağırışına hazırlıqla əlaqədar Xidmətin Gədəbəy rayon şöbəsində tibbi şəhadətləndirilmiş, öyrənilmiş və hərbi xidmətə yararlı hesab edilmisiniz. Sizin 2023-cü ilin aprel çağırışında müddətli həqiqi hərbi xidmətə göndərilməyiniz nəzərdə tutulmuşdur. Qeyd edirik ki, vətəndaşların hərbi hissələrə təyin olunmaları haqqında növbəti məlumat 2023-cü il 20-25 aprel tarixlərində Xidmətin saytında  yerləşdiriləcəkdir. Bununla yanaşı, çağırışçılar hərbi hissələrə təyin olunmaları barədə SMS vasitəsilə məlumatlandırılacaqlar.
Nicat Soruşur Yazılma Tarixi:04.04.2023 16:52:33

Yararlıyam Yararsız ?

Məlum olmuşdur ki, 2023-cü ilin aprel çağırışı zamanı Siz Xidmətin Saatlı rayon şöbəsinin hərbi həkim komissiyası tərəfindən tibbi baxışdan (qanın, sidiyin ümumi analizləri, EKQ, USM və döş qəfəsi orqanlarının flüoroqrafik müayinələri) keçirilmiş və Azərbaycan Respublikası Nazirlər Kabinetinin 29.02.2008-ci il tarixli 59 nömrəli qərarı ilə təsdiq edilmiş “Hərbi-həkim ekspertizası haqqında Əsasnamə”nin “Xəstəliklər cədvəli”nin I qrafasına əsasən “Hərbi xidmətə yararlıdır” hesab edilmisiniz. Bildiririk ki, Siz 2023-cü il aprel çağırışı zamanı müddətli həqiqi hərbi xidmətə göndəriləcəksiniz.  
Nicat Soruşur Yazılma Tarixi:04.04.2023 00:46:13

Salam,mən hərbi xidmətə yararlıyam?...

Məlum olmuşdur ki, 2023-cü ilin aprel çağırışı zamanı Siz Xidmətin Saatlı rayon şöbəsinin hərbi həkim komissiyası tərəfindən tibbi baxışdan (qanın, sidiyin ümumi analizləri, EKQ, USM və döş qəfəsi orqanlarının flüoroqrafik müayinələri) keçirilmiş və Azərbaycan Respublikası Nazirlər Kabinetinin 29.02.2008-ci il tarixli 59 nömrəli qərarı ilə təsdiq edilmiş “Hərbi-həkim ekspertizası haqqında Əsasnamə”nin “Xəstəliklər cədvəli”nin I qrafasına əsasən “Hərbi xidmətə yararlıdır” hesab edilmisiniz. Bildiririk ki, Siz 2023-cü il aprel çağırışı zamanı müddətli həqiqi hərbi xidmətə göndəriləcəksiniz.  
Cədvəldə sətir sayı :14949

2014 - Səfərbərlik və Hərbi Xidmətə Çağırış üzrə Dövlət Xidməti. Müəllif hüquqları, "Müəlliflik hüququ və əlaqəli hüquqlar haqqında" Azərbaycan Respublikası Qanununa əsasən qorunur.